Letterlik.

Clicks Group, sowel as Dis-Chem, het eksponensieel goeie groei getoon sedert hulle op die JSE genoteer is. Vir Clicks was die groot jaar 1996 en vir Dis-Chem was dit in November 2016.

Clicks Group bestaan uit verskeie van die voorste kleinhandel-markleiers in die land, te wete GNC, The Body Shop, Claire’s, Musica en Clicks. Die groep het meer as 870 winkels oor Suider-Afrika heen en besit die grootste kleinhandel-apteekgroep in die streek met meer as 545 in-winkel-apteke.

United Pharmaceutical Distributors (UPD) is Suid-Afrika se grootste nasionale farmaseutiese groothandelaar met volle reekswydte.

Clicks is in vennootskap met die department van gesondheid en meer as 420 van sy apteke is geregistreer as afhaalpunte vir staatswerkers se kroniese medisyne. Dit het natuurlik die balansstaat se spiere laat bult.

Die groep se aandeelprys het met 212,49% sedert 22 Januarie 2015 gestyg tot die ooreenstemmende datum in 2020. Met die skryf van die artikel was sy aandeelprys op die JSE 26475 sent (XD).

Nasionale Gesondheidsversekering (NHI)

Die groep sê dat hy reeds goed geposisioneer is om die NHI-stelsel te steun en potensieel 58 miljoen Suid-Afrikaners te bedien in vergeleke met die 8,9 miljoen wat huidiglik deur private gesondheidsversekering gedek word.

Die opbrengs op kapitaal is 34,66%

Hoewel die aandeelprys se styging geweldig indrukwekkend is, mag dit dalk met ‘n korttermyn-visie effens duur wees, met ‘n P/V ratio van 39,23.

Op langer termyn, met sy staatskontrak, en die regering wat vasbeslote lyk om die NHI in werking te stel (hoewel in fases), mag Clicks dalk ‘n baie goeie koop wees as die aandeelprys daal.

Die volgende AJV is op 30 Januarie 2020

Dis-Chem Pharmacies Bpk.

Dis-Chem se aandeelprys het teen die tyd van skrywe met 16,20% gestyg (2784c per aandeel) sedert hy net meer as drie jaar gelede genoteer het. Die aandeelprys het egter reeds in Januarie 2018 ‘n drie-jaar-hoogtepunt van 3901c bereik.

In die vorige finansiële jaar het die groep se totale inkomste verbeter van 28,0% tot 29,1%).

In ‘n mark waar verbruikers hulle gordels baie nouer moes intrek, was dit dit nogal ‘n prestasie. Volgens Dis-Chem se finansiële state vir 2019 het die groep bly voordeel trek uit beter handelsvoorwaardes met voorsieners namate dit markaandeel oor kernkategorieë heen verbeter. Bedryfswins het met 8,2% verbeter tot R1,2 miljard rand, en die groep se bedryfsmarge was 5,7%.

‘n Voordeel wat Dis-Chem het is dat hy “die voorsiener by voorkeur van die meeste mediese fondse” is. Dit beteken dat hy netwerkooreenkomste in plek het met die meeste mediese fondse en eise ten volle betaal word, onderworpe aan sekere terme en voorwaardes.

Sy P/V-ratio is selfs hoër as Clicks s’n, maar te oordeel aan die toue mense wat soggens wag vir sy klinieke om oop te maak, kan die ratio laer wees as die volgende stel finansiële state gelewer word.

GEVOLGTREKKING:

Die mark is daar. Dit hang van bestuur af om toe te sien dat die aandeelhouers se beursies al hoe vetter word.

Disclaimer: Maarten Roos is a freelance financial sub-editor, has written or edited news in the news media and has been meddling in shares for himself for more than 30 years. He is not a financial advisor and this article should not be seen as financial advice.